Paasisavummi naliliisartut katitigaanerat unammisitsineq sumut tunnganersoq ersarissumik takutippaa: ilisimatusarneq tamanut attuumassuteqartumik paasiuminartumillu saqqummiunneqassasoq. Ilisimatusarnermik, oqaluttuarinninnermik isiginnaartitsinermillu tunuliaqutaqarlutik naliliisartut pingasut saqqummiussillaqqinneqqusaannermut annguttut saqqummiinerisa pitsaassusaat kisiisa nalilersussanngilaat, aammali oqaluttuaq sunniuteqarluartoq oqaluttuarisinnaanerat, ilisimatusarneq paasiuminaassinnaasoq paasiuminartumik saqqummiussinnaanerat kiisalu tusarnaartunik alapernaatsunngortitsisinnaanerat nalilersussavaat. Saqqummiinerit ataasiakkaat naammassigaangata naliliisartut pitsanngorsaanissamut iluaqutaasunik oqaaseqaateqartassapput, naggataagullu Paasisavummi ajugaasoq toqqassavaat.