Nick Duelund saqqummiussani pillugu Paasisavut 2023-mi ajugaavoq. Taassuma kalaallit meerartaasa isigiarsunnerat pillugu Ph.D.-nngorniutini saqqummiuppaa.
Arctic Hubi sinnerlugu annertuumik qujarusuppugut. Suleqatitsinnut qujanaq, tassa Ilisimatusarfimmut, KNR-mut Katuamullu. Inersuarmi peqataasunut tamanut qujanaq, misigisimaneq nuannerluinnartoq pilersipparsi. Qujanaq tamanut angerlarsimaffinnit isiginnaaqataasunut, oqariartuuterpassuarnullu nersualaarinnittunik nassiussisimasunut. Kiisalu aningaasaliisutsinnut qujarusuppugut, tassa Nuummi Najukkami Ataatsimiititaliamut, Brugsenimut aammalu Inuit Clothing.
Fotograf: Emil Nørgaard Stach
Takornariartaatinik nungusaataanngitsumik takornariartitsisarneq, meeqqat isigiarsuttut Tasiilallu illoqarfianik ineriartortitsineq Nuummi unammisitsinersuarmi ilisimatusartunit saqqummiunneqartussat ilagaat.
Allaatiginnittoq Ole Ellekrog
Maanna saqqummiussillaqqinneqqisaannermi Paasisavut 2023-mi peqataasussat toqqarneqareersimalerput. Ilisimatusartut tallimat toqqagaapput, taakkunanngalu pingasut Ilisimatusarfimmut atassuteqartuupput.
’Paasisavut’ ph.d.-nngornianik Kalaallit Nunaanni ilisimatusartunik unammisitsiviuvoq nutaaq. Marsimi toqqaannartumik aallakaatitsinersuarmi ph.d.-nngorniat ilisimatusarfigisaminnik Kalaallit Nunaanni innuttaasunut saqqummiussillaqqinneqqisaatissapput. Kikkunnut tamanut paasiuminartumik saqqummiussillaqqinnerpaaq ajugaassaaq. Unammisitsineq KNR-ikkut aallakaatinneqassaaq, ajugaasorlu Brugsenimit tapiissutigineqartunik 25.000 kroninnassaaq.
Maanna neriuppugut ajugaaniuteqataasut tallimat ilisimasaminnik inunnut sapinngisamik amerlanerpaanut ingerlatitseqqiinissaminnut Paasisavut iluaqutigisinnaassagaat,” Anna-Sofie Skjervedal.
Ajugaaniuteqataasut tallimat ilisimatusarnerup silarsuaani assigiinngilluinnartuneersuupput. Taakkua ilaat nunatsinni masarsunnik kvælstoffimik misissuisimavoq, alla takornariartaatinik takornariartitsisarnermik qanoq nungusaataajunnaarsitsisoqarsinnaaneranik misissuisimavoq, pingajuat kalaallit meerartaasa isigiarsuttunngornissaannik qanoq pinaveersaartitsisoqarsinnaaneranik misissuisimavoq, sisamaat Tasiilap illoqarfianik ineriartortitsinermik misissuisimavoq tallimaallu pitsaasumik inuuneqarnerup kalaallinut qanoq paasisariaqarneranik misissuisimalluni. Taakkua tamarmik ilisimatusarfigisaminnik saqqummiussillaqqilluinnartuunertik assigiissutigaat.
’Paasisavut’ siullermeerluni ingerlanneqalerpoq. Unammisitsineq marsip 1-ianni 2023 Katuami Nuummiittumi pissaaq. Unammisitsineq Arctic Hubimit Ilisimatusarfimmillu aaqqissuunneqarpoq. Arctic Hubimi allattoqarfiup pisortaa, Anna-Sofie Skjervedal, ima oqaaseqaateqarpoq:
”Unammisitsinermik Paasisavutut ilusilimmik Kalaallit Nunaanni siullermeerluni ingerlatsisoqalerpoq, qinnuteqaatillu nassiussarsiavut amerlangaarmata tupaallaqqaqaagut. Ilisimatusartut ilisimasaminnik paasisimasaminnillu innuttaasunut ingerlatitseqqikkusuttut taama amerlatiginerat takullugu nuanneqaaq. Maanna neriuppugut ajugaaniuteqataasut tallimat ilisimasaminnik inunnut sapinngisamik amerlanerpaanut ingerlatitseqqiinissaminnut Paasisavut iluaqutigisinnaassagaat,” Anna-Sofie Skjervedal, Arctic Hubip allattoqarfiani pisortaq taama oqarpoq.
ILISIMATUSARTUT TALLIMAT UKU UNAMMISITSINERSUARMI
2023-MI PEQATAAPPUT
Ilisimatusarfik
Ulunnguaq Markussen
Piniartoq in a globalized world - Tasiilap illoqarfianik ineriartortitsineq
Kalaallit Nunaat ineriartorfiujuarpoq, ingammik Kalaallit Nunaanni illoqarfinnut nunaqarfinnullu tunngatillugu. Pitsaanerpaamilli ineriartortoqarnissaa qanoq qulakkeerneqarsinnaava? Sumiiffinni ataasiakkaani nunaluunniit tamakkerlugu pitsaanerpaamik aaqqiissutissarsiortoqassava?
Ilisimatusarfik
Nick Duelund
Kalaallit meerartaasa isigiarsuttarnerat
Isigisaqarsinnaanerput inuttut ulluinnatsinni atorluartakkatta pingaarnersaannut ilaavoq. Ingammilli meeqqat isigisaannik misissuisarnissaq kingornalu isigisaqarsinnaaqqilernissamut pisariaqartunik iluaqutissinneqarnissaat Kalaallit Nunaata qanoq qulakkeersinnaavaa?
Aalborg Universitet aamma Ilisimatusarfik
Naja Carina Steenholdt
Subjective Well-being and Quality of Life in Greenland - Kalaallit Nunaanni pitsaasumik inuuneqarneq
Statistikkit naapertorlugit Kalaallit Nunaanni inuuneq tujorminarpoq;
isumaginninnikkut ajornartorsiutit inuiaqatigiinnilu pisut nuanniitsut oqaluttuarineqartuni maluginiarneqarajuttuupput. Tamannali kalaalerpassuit inuunerminnik naammagisimaarinninnerarnerannut qanoq naapertuuppa? Inuiaqatigiinni suut pingaarnerusutut isigineqarpat?
Københavns Universitet, Centret for Permafrost
Laura Helene Rasmussen
Nitrate movement in the permafrost landscape affected by snow redistribution - Kalaallit Nunaata masarsuini kvælstoffi
Kalaallit Nunaata kissatsikkiartuinnera qanorpiaq sunniuteqarpa? Laura kvælstoffip aasaanerani ukiuuneranilu masarsummi maanna ineriartorneranik siunissamilu ineriartornissaanik misissuivoq. Tassami masarsuk siunissami naasut aqqutigalugit CO2-mik milluaannginnerulerluni nunap iluanit qeriuaannartumit CO2-mik aniatitsinerulissava?
Copenhagen Business School
Elizabeth Cooper
Towards a Sustainable Cruise Tourism Industry: Changing Tourist Behaviour in the Ports of Greenland - Kalaallit Nunaanni takornariartaatinik nungusaataanngitsumik takornariartitsisarneq
Takornariartaatinit Kalaallit Nunaanni tulattartorpassuarnit takornariartitsisarnerup nungusaataanngitsumik ineriartortinneqarnissaanik qanoq qulakkeerisoqarsinnaava? Takornarianik ileqqorissaarnerulersitsisoqarsinnaava, aamma takornariat nunaqavissullu suleqatigiilluarnerulersinneqarsinnaappat?